Epilepsiya tutmaları zamanı ilk yardım

Epilepsiya krizləri, fərqli formalarda meydana gəlir. Yerə yıxılma, vücudun nəzarətdən kənar hərəkətləri və s. Belə tutmaların təhlükəli ola biləcəyini vurğulayan mütəxəssislər, epilepsiya keçirən şəxsə su və ya qidanın verilməməsinin vacib olduğunu dilə gətirirlər. Bu barədə türk neyroloji mütəxəssisi Barış Metinin dediklərini təqdim edirik.
Bəzi xəstələrdə kriz anı sakit, sabit duruş formasında baş verir. Ancaq bəzi tutmalarda isə şəxs yerə anidən yıxıla və vücud spazmları tuta bilər. Bu zaman təcili tibbi yardıma müraciət etmək lazımdır.

Bəs ilkin müdaxilə necə olmalıdır?

Bu zaman şəxsi ehtiyyatla yerə uzatmaq lazımdır. İlk olaraq sakit qalmalısınız.

Şəxsə zərər verə biləcək əşyaları ətrafından uzaqlaşdırın.

Başının altına yumşaq nəisə qoyun.

Sol tərəfə çevirin və rahat nəfəs almasını asanlaşdırın.
Sinə düyməsini açın və boğaz nahiyəsi açıq, sıxılmamış formada qalmalıdır.

İnsanlar adətən kömək məqsədilə bəzi hərəkətlər edirlər ki, əslində bu, kriz keçirən insana köməkdən çox zərər verir.
Bunlar hansılardır?

Spazmları dayandırmağa çalışmayın, özünün vaxtı var.

Ağzına bir şey salmayın, bu çənə və dişlərdə zədələnmələrə yol aça bilər.

Süni tənəffüs etməyə çalışmayın, tutmalar bitən zaman tənəffüs geri gəlir.

Özünə tam gələnə qədər su və ya qida verməyin. Şüuru yerində olmayan zaman verəcəyiniz qida ağciyərlərə keçə bilər.